【黄金十年】之两：青帮个崛起同杜月笙神话 (original) (raw)
1920年代，同布尔乔亚社会一道成长个，还有上海个黑社会势力，个当中，杜月笙同黄金荣起到邪气大作用。本书作者因为是法国佬，就着重谈到黄金荣同杜月笙在拉法租界个活动，从迭个当中也可以看出来，相比英美公共租界个精英集团，来自利维坦派遣个法国人，同上海特别市个车轮一样，更加好畀买通，心甘情愿为黑社会服务。
1）青帮做大是鸦片走私个结果
同全球所有地方个黑手党一样，上海个秘密社会，也需要依靠做坏事体谋生。伊拉是所有违法行为，比方讲：走私、赌博、卖淫之类活动个保护人，并为此问从业者索要钞票。弗过，上海秘密社会个发展壮大，并且成为左右城市生活个势力，还是要到1920年代之后，关键性个事体，是伊拉开始涉足鸦片贸易。通过迭个做法，青帮集聚邪气惊人财富，并且发展出自家个权力基础。
1920年代，鸦片在拉上海社会当中个作用，就同几乎同一辰光禁酒之后美国酒精饮料一样：明面高头禁止，事实上需求邪气强烈。个能，也就让黑道人物认为，迭个行业是伊拉必须控制个市场。1919年，中国全面禁止鸦片个进口同生产，导致走私鸦片价格快速增长，在拉迭个阶段，走私鸦片个人是地方军阀同潮汕商人，有名个军阀卢永祥，就是1920年代初鸦片贸易个负责人。
弗过，鸦片个具体销售总归弗好要体面个军人或者商人来做，个么，就需要一些社会边缘人物，充当迭个事体个”白手套“——青帮，就从负责鸦片交货，防止警察干预或者其余帮派打劫，开始发家，弗过，内部斗争也因为迭个赚头老足个事体，越来越激烈。
1924年，卢永祥垮台，公共租界趁机打击鸦片贸易，青帮分子从公共租界向法租界转移，黄金荣利用伊同法租界当局个”特殊关系“，开始慢慢做大。伊同伊个来两个帮闲——杜月笙同张啸林，成为鸦片大型走私企业“三鑫公司”个掌门人，个两个人当中，杜月笙负责处理更多江湖高头个事体，并且同黄金人个大太太关系密切，张啸林主要负责对上层军阀打交道，走个是上层路线。
黄金荣对法租界个官僚喜好邪气熟悉，伊自家老早是法租界华警个头目，熟悉所有行贿技巧，到1925年，法租界当中缴纳保护费之后进行鸦片交易，已经变成功一种公开“默契”。三鑫公司同法租界个管理机构——公董局公开进行谈判，并且通过签署协议，认可三鑫公司卖卖鸦片个垄断地位。作为回报，三鑫公司缴纳一大笔钞票，作为公董局派遣警察保护自家个“保护费”，迭个交易弗单单在拉鸦片贸易高头具有邪气重要个意义，对法租界19世纪以来个权力结构，也是颠覆性冲击：老早名声响亮个天主教世家，在拉公董局当中个地位，开始畀黑社会混混替代。
1927年，杜月笙在拉反ROJO个“412”事变当中起到关键性作用，声望更加结棍，到迭个辰光，伊个声势已经彻底拿老早个天主教本地土豪压倒，完全好同法租界公董局平起平坐。
2）青帮对法租界控制个巩固
1920年代挨末阶段，青帮成功拉拢法租界新任领事柯格霖（Edgar Koechlin），在拉迭个阶段，杜月笙因为得到蒋介石授予个名誉头衔，已经成为有权有势个名人。伊在拉法租界招摇过市，完全弗拿公董局当一回事体，伊个朋友分布在拉公董局内部各个部门，包括公董局董事、律师以及各种行政官僚。依靠伊拉个帮忙，杜月笙让鸦片买卖在拉法租界开始公开进行，并且让公董局同自家个利益越来越密切。
杜月笙一般用个方法是送有权势个人钞票，弗过，伊觉得有必要个辰光，也会采取别个方法来扩张自家势力（比方讲绑架、暗杀），对外，伊一直用一副江浙文人面孔展示自家个“儒雅”，并且圈养杨度之类名头响亮，但无啥影响力个落魄、过气文人，为自家增加“文化色彩”。
1926年到1927年，以及1929年，伊好几趟让潜在个ROJO运动畀自家个打手消灭，法租界当局对伊感恩戴德，青帮在拉工人组织当中个势力，也越来越大。一个典型个案例是【法商电车公司】，迭企业负责对租界个公共运输同供应水电，1925年， 公司成立工会，杜月笙拿自家个小弟全塞到里向，几年下来，基本拿公司当中个ROJO分子肃清，之后，伊个“清算ROJO”方法，扩散到各种公司，一方面让租界当局对伊个帮忙更加依赖，另外一方面也让青帮个势力越来越广阔。
杜月笙在拉租界当中个权势，让本身就同伊关系密切个车轮上海特别市当局邪气欣赏，在拉交关华文舆论同KMT眼里向，杜月笙已经是一个“爱国”“儒雅”个绅士，是一个相比交关油头粉面“资本家”，更好信赖个人物，伊对文人圈子慷慨施舍，也获得交关肉麻吹捧，一般来到上海个底层阿飞，更拿伊当成自家偶像，以及伸张自家权益个恩人。
1930年代初，黄金荣、杜月笙、张啸林已经平起平坐，杜月笙在拉三人当中势力顶大，成为上海黑道社会个代表人物，华人居民拿伊当作自家领袖，法租界当局也送迭个恶棍头衔同官位，为赢得迭个新尊严，伊使用龌蹉手段，拿本身同公董局密切个天主教土豪全排挤出局，个当中，就包括在拉1929年拿法租界老早顶有地位个华人董事魏廷荣绑架，就在拉同一年，杜月笙自家成为法租界董事。
作为鸦片大佬，控制警察，好煽动民众，又混迹士绅群体，还畀车轮器重，杜月笙已经成为法租界事实上个第一号人物。工部局个英国人对法租界个权力混乱感到邪气担心，法租界也成为伊拉眼里向西方势力在拉上海个“软肋”。即便是法国本土，也对此类削弱自家集权控制个方法，感到弗适意。1932年1月，当日本人进攻上海个华界辰光，驻防个法国军队建立军事当局，取代公董局，杜月笙个董事地位畀注销，之后，法租界在拉杜月笙命令之下，开始爆发罢工，混乱以及交关趟刺杀活动，到3月，法租界通过赔偿换取杜月笙拿三鑫公司转移到华界，在拉搬迁过程当中，法国巡捕提供全程保护。
3）青帮在拉华界个控制
1932年之后，青帮个主要活动范围转移到华界，在拉车轮当局个支持之下，青帮同车轮个合作越来越密切。杜月笙同车轮当局共同分享鸦片走私活动获得个暴力，迭笔钞票畀用来支付车轮在拉江西ANTI ROJO需要个军饷，对车轮来讲邪气重要。杜月笙本人，也用迭笔钞票控制华界，同时，为自家沽名钓誉，提供经费。
明面高头，车轮当局继续对老百姓吹嘘自家对禁止毒品个态度，以及决心，事实上，伊拉对参与瓜分毒品交易，邪气热诚，1930年代，上海是亚洲，甚至是全球排名前茅个鸦片码头，每个月头，从印度、伊朗进口个鸦片从上海登陆，规模达到13万磅以上，同时，还从云南、四川之类军阀控制区进口大量鸦片。此类鸦片从本地个提炼厂中加工，并且通过在拉华界个码头转运到内陆。杜月笙具体负责鸦片个事务，每个月上缴车轮财政部300万钞票，让双边保持高度个同谋关系，有个辰光，杜月笙还会拿迭个关系用更加高尚个途径反映出来，比方讲，伊自家掏钞票，”为国捐赠“（实际就是送把蒋介石）一个空军中队个飞机。
到1930年代中期，杜月笙已经是上海个“大亨‘,无官职个”大老倌“，伊个存在，让车轮同以辰光大力提倡个“新生活运动”变成彻底个讽刺：当局激励鼓吹个道德规范，居然是在拉一个大流氓身上来体现，迭个矛盾性，充分体现出上海车轮当局个脆弱。
车轮当局对迭个大毒枭邪气推崇，也利用青帮个渗透能力，方便自家对上海各个自治体，小团体个控制：从各类公会到各种商会，从爱国慈善团体到市府议会。杜月笙也认为，自家理所当然是上海各界个代表人物：伊是禁烟委员会常委（讽刺来兮），又是上海商会常务理事（不晓得之前意气风发个资本家哪能想），还是市参议会主席（同车轮勾结个公开化），每趟常凯申来到上海，杜月笙全要去同伊碰头，解山河。
在拉劳工界，杜月笙已经弗满足单单操纵工头或者帮会内部个兄弟，或者充当调节冲突个中间人，伊开始直接夺取主要公会个控制权，并且按照车轮当局个意志，通过自家夺取个公会进行活动（参考后势来台湾、香港一些公会个活动）；在拉金融界，杜月笙同交关商业资本家创办中汇银行，为伊汏钞票提供掩护，1932年开始，KMT个国有化策略，让伊更有机会侵吞上海资本家个财产，比方讲中国银行上海分行，全国轮船业公会之类；在拉拉拢精英集团个过程当中，杜月笙决定创办一个所谓个俱乐部组织——恒社，通过迭个组织，伊好同交关企业家、政治家、记者、或者律师直接接触，拉拢，个能，就拿老早社会黑暗面个青帮势力，直接公开化，成为上海滩交关人顶礼膜拜个中心。
1931年，浦东高桥【杜氏宗祠】落成，8万上海人向杜月笙祝贺，祝贺队伍延绵好几公里，各级官员、士绅、商人、巡捕同流氓地痞混迹一道。常凯申同车轮个上海当局，还有法租界公董局、外国商人全发来大量贺电，辛亥元老章太炎（另外一个畀杜月笙圈养个过气文人）为祠堂题写匾额。
喧哗之后无几许辰光，祠堂内部就修造起上海顶顶大个吗啡提炼厂。
除脱在拉上海，还有啥地方好造就个能个【英雄神话】哉？
有关键情节透露