开埠前上海概况 (original) (raw)

第一眼看，上海是五个通商口岸当中顶无么花头个场许。个么，为啥英国人情愿选择上海，迭个被第一批西方移民描绘成“堆满烂污泥”个城镇，而弗是广州、福州、厦门或者宁波作为条约制度个试验地？

搭广州、福州相比，上海震池上无啥特殊地位、搭宁波、厦门相比，上海又无么天然良好个港口。上海在拉黄浦江左面，距离黄浦江同长江口汇合处，大概有18公里。上海四周个土地只恰好高出海平面，遍布交关相互交错个河流同水道，水流随潮汐变化潮涨潮落，经常变成灾害。除脱农业资源之外，迭个地区呈现出一种平静个状态。法国船长格拉韦维尔就因为此地个单调景色，产生犹豫同奇怪个联想：

我伲完全弗好想出比此地--迭个冲积平原更加无聊么劲个区域，在此地，水流经常漫出河浜，搭个片一望无际个空间相比，即便是卡尔马格同夏朗德地区也好算是优美个风景哉，这当真是一种恰如其分个【皿嘴】，农作物蛮多，树木无么个，田野肥沃，无任何起伏，在拉农民看来是顶可靠个保证，对人个灵魂就弗好激发任何灵感。

19世纪初个上海，在西方人看来其貌弗扬，但也完全弗是后世所谓个“渔村”。迭个在拉黄浦江边个城市，有廿几万居民，城市同周边地区商业活动踊跃，原先个城墙因为交关辰光弗曾打相打，老早就濒临坍塌。城市当中街巷纵横，主要个街道有三米多阔，砖石铺路；道路搭阳沟组成城市网络，上涨个江水周期性清洗高头个迹浞。有几个有棱有角个庙宇屋顶高高耸立，俯瞰周边用茅草、芦苇搭瓦片修造个低矮民居。此地同北方城市布局推板邪气大，寻弗到存心编排个痕迹。

外国人对上海个注意到19世纪初才开始兴起。1832年，胡夏米乘坐“阿美士德号”货船来到长江口考察，伊统计出，一个礼拜当中从北面进入上海港装在豆类同面粉产品个漕运船舶就有得四百多艘。15年之后，第一任英国驻上海领事巴富尔也称赞迭个城市个战略地理位置，上海地处长江出海口搭帝国南北海岸中心店，是链接沿海同长江个节点。

英国人查顿（willam Jardine）是远东有名个阿片批发商，伊1841年成为英国国会议员，开始吹捧上海个光辉前景。查顿老里巴早就开始在拉上阿辉从事鸦片个“港脚贸易”，认为上海个环境，当地人个默契，全符合英国人做生意个理想地理位置。

弗过，上海个商贸发展更多层次浪替伊地处江南地区相关。从15世纪开始，上海已经变成一座市场化个商业城市。伊个兴起主要是因为长江下游各地个经济发展，导致个商业发达。上海老早就开始向其他地区输出原棉、棉纱、棉布同丝绸，输入大米、茶叶同豆渣饼（肥料用）。1684年禁海令取消之后，上海个海运贸易更加发达，虽然迭个辰光广州垄断所有对外贸易，但上海已经成为江浙向广州运输商品个重要中转港口。

整个18世纪，上海个贸易持续增长，到19世纪开始加速。迭个阶段，老早个大运河因为泥沙淤积，漕运航行越来越困难，开始走海陆北上。个能，也让上海成仔新运输网络个龙头。沙船个体型越来越大，上海停泊个商船带来更大个资金需求，激发钱庄个迅速发展。到18世纪末，上海已经有125家钱庄。根据宁波商人当中运营几十年个信贷关系，钱庄发行个票据已经成为一种名副其实个信用货币。

伴随经济发展，上海个震池地位也逐眼上升。1730年，苏松道迁到上海，从此上海道台成为上海权力顶大个长官。道台弗单管辖苏州、松江廿几只县，还有收关税个责任。之后，上海就成立办理漕运个“海运总局”。上海在拉江苏乃至江浙个海港优势地位，也越来越明显。

繁荣个贸易同上升当中个城市地位，让私人经济也迅速发展。手工业、小业主、制造商、出口商等，侪来到上海，作为发家致富个平台。18世纪开始流行个商人类会馆，也在拉迭个阶段在上海迅速发展。1830年，上海已经建立21家会馆，这些会馆只允许本乡人加入，分别体现弗同地区商人个商业利益。比方讲，来自东北同山东个商人从事蔬菜、豆制品批发，宁波商人控制钱庄，福建商人专门经营糖同木材贸易，潮汕商人专门走私鸦片。

会馆保障各自行业个贸易运转，对协调上海经济，并平衡各方势力个过程当中发挥重要作用。会馆还发挥社会责任，对内部开展慈善活动，并且修造寺庙、殡仪馆、公墓并创办学堂。上海商人依靠会馆，在拉商业上拥有一定自主性，但面对满大人，伊拉还是同帝国别个地方一样，处于一种相对弱势个地位。除此之外，伊拉同蹲在苏州、杭州个士大夫文人也存在差异。虽然讲一些有钞票个商人通过捐纳，获得同样个地位，弗过这种机制本身还是继续遵循儒家规则，并且始终受到满大人监控，以确保正统性。

所以，以满大人为代表个政治势力同各大会馆公所控制个社会经济实力之间存在复杂个关系。虽然商人一般有兴趣合作，但有辰光，具备组织力个会馆也会成为满大人头疼个雅礼集团，为达到统治目的，上海县令或者道台会弗情愿个出来，对会馆个抱怨表示谅解并安抚。事实上，从1840年后英国人来华后面对个处置方式看，上海道台直到小刀会之前，也一直拿这些洋人当成另一种形式个“会馆”，在处理方式，安抚法术上，同对付潮汕人、福佬人，冇啥太大区别。

有关键情节透露