Вершы (original) (raw)

"…Па песнях вечнасці іду"	[Jun. 23rd, 2014|04:38 pm]Вершы
[**Tags**|рэкляма]25 чэрвеня а 16-й гадзіне Літаратурны музей Петруся Броўкі гасцінна расчыняе дзверы былой кватэры паэта, каб адзначыць дзень народзінаў вядомага чалавека, класіка айчыннай літаратуры — народнага паэта Беларусі Петруся Усцінавіча Броўкі.Ва ўспамінах "Пра Петруся Броўку" (1984) Васіль Быкаў адзначыў: "Жыццё паэта — частка духоўнага вопыту народа, а кожны народ шануе, збірае да аднае скарбонкі свой духоўны вопыт, без якога ён — не народ, а толькі вялікая ці малая грамада людзей". Спрычыніцца да гэтага вопыту, адчуць радасць сустрэчы з цікавымі людзьмі, а таксама апынуцца ў элегантнай творчай атмасферы, у якой працаваў вядомы аўтар "Александрыны" і "Пахне чабор", запрашаем у дзень нараджэння Петруся Усцінавіча.Сярод запрошаных — Людміла Карпава, Ганад Чарказян, Галія Фатыхава, прадстаўнікі творчага калектыву выдавецтва "Беларуская энцыклапедыя імя П.Броўкі", лаўрэат конкурса "Эстрада БДУ" Вольга Кірлік. Ва ўсіх, хто завітае на мерапрыемства, будзе ўнікальная магчымасць пазнаёміцца з Сяргеем Скарабагатавым — сынам прататыпа героя рамана П.Броўкі "Калі зліваюцца рэкі" Алеся Іванюты. Месца правядзення: Літаратурны музей Петруся Броўкі (г. Мінск, вул. К.Маркса, 30)
link	камэнтаваць

"...Галоўнае ў жыцці – жыццё"	[Feb. 27th, 2014|03:21 pm]Вершы
[**Tags**|рэкляма]4 сакавіка а 16-й гадзіне ў рамках праекта "Апякункі паэтычных нябёсаў" адбудзецца вечарына "...Галоўнае ў жыцці – жыццё", прысвечаная 85-годдзю з дня нараджэння вядомай беларускай паэтэсы Еўдакіі Лось. Арганізатарамі мерапрыемства выступілі Дзяржаўны музей гісторыі беларускай літаратуры і Цэнтральная навуковая бібліятэка імя Якуба Коласа НАН Беларусі.Вясна – найлепшая пара для паэтаў: абуджаецца жыццё, абуджаюцца ўзнёслыя пачуцці ў сэрцы і нараджаюцца прыгожыя радкі. У сваім вершы "Сакавік" словы радасці абвясціла славутая беларуская паэтэса Еўдакія Лось. Яна нарадзілася ў першы дзень вясны 1929 года. Назву першага веснавога месяца яна дала і сваёй першай кнізе – "Сакавік" (1958). Гэтай жанчыне-паэтцы, упэўненай і ўстойлівай, як само жыццё, наканавана было захаваць і пранесці праз усе выпрабаванні вечныя духоўна-эстэтычныя ідэалы прыгажосці, дабрыні, спагады, а таксама веры, любові і надзеі. Уладзімір Караткевіч назваў некалі Еўдакію Лось "жытніцай" – "істотай з беларускага фальклёру, якая жыве ў каласах і памірае толькі тады, калі апошні чалавек сабраў свой ураджай. Яна дапамагае ўсім і дух яе жыве нават у тым пучку жыта, які выносяць вясною на Юр’я ў поле". "А за добрае стаўленне да мяне і заступніцтва, – пісаў Ул. Караткевіч, – я, калі напішу якую-небудзь паэму, прысвячу яе табе..."Цэнтральная навуковая бібліятэка імя Якуба Коласа Нацыянальнай акадэміі навук Беларусі падрыхтавала выставу "Зараз выкажу, выпею сонца-душу", прысвечаную творчай спадчыне Еўдакіі Лось. На выставе будзе магчымасць убачыць усе яе прыжыццёвыя зборнікі, а таксама апошнія перавыданні і сучасныя публікацыі яе твораў. На выставе прадстаўлены не толькі вершы і паэмы, але і апавяданні, замалёўкі, бо як вядома, Еўдакія Лось пісала і для маленькіх чытачоў. Яе творы перакладаліся на розныя мовы свету, з гэтымі перакладамі можна пазнаёміцца на выставе, а таксама ацаніць перакладчыцкі талент самой Еўдакіі Лось. Творчая спадчына беларускай паэтэсы цудоўна дапоўнена яе перакладамі з англійскай, украінскай, рускай, латышскай, малдаўскай і іншых моў. Асобны раздзел выставы прысвечаны жыццёваму шляху Еўдакіі Лось, а таксама літаратурнай крытыцы яе творчасці, прадстаўленай працамі вядомых літаратуразнаўцаў.На мерапрыемства падзяліцца сваімі ўспамінамі і думкамі запрошаны родныя Еўдакіі Лось, паэты і пісьменнікі, прыхільнікі яе творчасці. Усіх чакае выступленне ўзорнага ансамбля народнай музыкі "Бараўлянская крынічка". Месца правядзення: Цэнтральная навуковая бібліятэка імя Якуба Коласа НАН Беларусі (вул. Сурганава, 15, інфармацыйна-выставачны цэнтр, 1 паверх, п. 110).
link	камэнтаваць

Прэзентацыя кнігі Валянціны Куляшовай "Лясному рэху праўду раскажу..."	[Feb. 24th, 2014|10:05 am]Вершы
[**Tags**|рэкляма]25 лютага 2014 года а 16-й гадзіне ў Нацыянальнай бібліятэцы Беларусі адбудзецца сумеснае мерапрыемства Дзяржаўнага музея гісторыі беларускай літаратуры і Нацыянальнай бібліятэкі Беларусі, прысвечанае прэзентацыі кнігі Валянціны Куляшовай "Лясному рэху праўду раскажу…", якая выйшла ў серыі "Жыццё знакамітых людзей Беларусі" і прымеркавана да 100-гадовага юбілею народнага паэта Беларусі Аркадзя Куляшова.Аркадзь Куляшоў займае годнае месца ў гісторыі беларускай літаратуры. Ён узняў нацыянальны паэтычны геній на якасна новую ступень, істотна рассунуў духоўныя і мастацкія гарызонты паэзіі. Створанае А.Куляшовым засведчыла такія выяўленчыя магчымасці роднай мовы, такую культуру мастацкага мыслення, такую культуру слова без якой сёння працаваць у паэзіі немагчыма.Назвай кнігі стаў крыху зменены радок паэта. У аповесці-эсэ Валянціна Куляшова распавядае пра свайго бацьку – народнага паэта Беларусі Аркадзя Куляшова. Тут і самыя яркія згадкі з яго маленства, і старонкі яго радаводу, і першае каханне, і шлях у літаратуру, і сяброўства з многімі пісьменнікамі. Аўтар уводзіць чытачоў у творчую лабараторыю паэта, паказвае, як нараджалася задума таго ці іншага твора і як яна потым ажыццяўлялася на паперы. Невыпадкова ў кнізе падаецца так шмат вершаў паэта і ўрыўкаў з яго паэм "Сцяг брыгады", "Варшаўскі шлях", "Хамуціус".Дзякуючы кнізе, чытачу стане больш блізкай паэзія творцы і яго жыццё.Месца правядзення: галерэя "Лабірынт" Нацыянальнай бібліятэкі Беларусі (пр. Незалежнасці, 116).
link	камэнтаваць

"Сагрэй, любоў, людское ў чалавечым"	[Feb. 19th, 2014|03:39 pm]Вершы
[**Tags**|рэкляма]26 лютага а 17-й гадзіне ў Гарадской бібліятэцы №1 імя Л.Талстога адбудзецца вечар памяці паэтэсы Валянціны Аколавай "Сагрэй, любоў, людское ў чалавечым". Вядомая беларуская паэтэса, перакладчык, член Саюза беларускіх пісьменнікаў і Саюза беларускіх журналістаў Валянціна Аколава заўчасна пакінула гэты свет 24 снежня 2013 года. 25 ліпеня 2014 ёй споўнілася б 60...Валянціна Васільеўна нарадзілася ў в. Мазуршчына Салігорскага раёна Мінскай вобласці. Скончыла Полацкае педагагічнае вучылішча імя Ф.Скарыны, філілагічны факультэт БДУ. Працавала настаўніцай ў Ветрынскай школе-інтэрнаце, метадыстам наваполацкага Палаца культуры нафтавікоў, карэспандэнтам шматтыражнай газеты "Знамя новостройки" трэста № 16 "Нафтабуд", у рэдакцыі радыёвяшчання Наваполацкага ВА "Палімір", у выдавецтве "Юнацтва", літкансультантам газеты "Знамя юности".Першыя вершы надрукавала ў 1968 г. Адзін з аўтараў паэтычнага зборніка "Сцяжына" (1983). Аўтар зборнікаў паэзіі: "За тым лугам зеляненькім" (1987), "Вяртанне ў заўтра" (1990), "Я люблю сваю Беларусь" (1990), "Случарыны" (1994), а таксама паэмы-п’есы "Палачанка Ігрэна, альбо Вяртанне Скарыны" (1990). Паэзія Аколавай вызначаецца лірызмам, спавядальнасцю, сувяззю з фальклорам (выкарыстанне фальклорных матываў і вобразаў, народна-песеннай стылістыкі). Многія вершы пакладзены на музыку. Паэтэса займалася перакладчыцкай дзейнасцю з рускай, украінскай і славацкіх моў, у перакладзе на беларускую мову быў выдадзены зборнік вершаў М.Цвятаевай.Мерапрыемства, наладжанае з ініцыятывы Беларускага радыё Дзяржаўным музеем гісторыі беларускай літаратуры і Гарадской бібліятэкай № 1 імя Л.Талстога збірае сяброў і калег па пяру Валянціны Аколавай, усіх, хто цікавіцца беларускай паэзіяй, каб аддаць даніну памяці нашай вядомай паэтэсе.Месца правядзення: Гарадская бібліятэка №1 імя Л.Талстога (станцыя метро "Інстытут культуры", вул. Маскоўская, 18).
link	камэнтаваць

Аркадзь Куляшоў. Ад Бесядзі да акіяна	[Feb. 3rd, 2014|03:01 pm]Вершы
[**Tags**|рэкляма]6 лютага а 16-й гадзіне ў Цэнтральнай навуковай бібліятэцы імя Якуба Коласа НАН Беларусі адбудзецца музычна-паэтычная вечарына "Аркадзь Куляшоў. Ад Бесядзі да акіяна", прысвечаная 100-годдзю з дня нараджэння народнага паэта Беларусі. Арганізатарамі мерапрыемства выступілі Дзяржаўны музей гісторыі беларускай літаратуры і Цэнтральная навуковая бібліятэка імя Якуба Коласа НАН Беларусі.Асоба Аркадзя Куляшова займае выключнае месца ў культурнай прасторы нашай краіны. Прысвяціўшы творчай дзейнасці 52 гады з 64 пражытых, А.Куляшоў пакінуў невычарпальную спадчыну глыбокага маральна-этычнага, гуманістычнага, эстэтычнага зместу, узбагаціўшы беларускую літаратуру паэзіяй душы. "Духоўнай энцыклапедыяй яго пакалення" называў Пімен Панчанка паэзію Куляшова.Да мерапрыемства прымеркавана адкрыццё кніжнай выставы "…І сэрца абпалена смагай радка", якую падрыхтавала Цэнтральная навуковая бібліятэка імя Якуба Коласа НАН Беларусі. Творчая спадчына паэта вялікая і шматпланавая, яна налічвае каля 30 кніг паэзіі. Сярод экспанатаў выстаўкі і першыя зборнікі: "Росквіт зямлі" (1930), "Медзі дождж" (1932), "Па песьню, па сонца!.." (1932), асобныя публікацыі добра вядомых паэм, сучасныя перавыданні. Творы А.Куляшова не аднойчы перекладаліся на іншыя мовы свету. На выставе прадстаўлены вершы паэта на рускай, украінскай, польскай, англійскай, літоўскай, балгарскай мовах, нават на таджыкскай, армянскай, мангольскай і іншых. Асобны раздзел выставы пазнаёміць з таленавітымі перакладамі Куляшова на беларускую мову паэмы Аляксандра Пушкіна "Цыганы" (1937) і рамана ў вершах "Яўгеній Анегін" (1949), "Выбранай паэзіі" Міхаіла Лермантава (1969), паэмы "Энеіда" Івана Катлярэўскага (1969), "Спеў аб Гаяваце" Г.Лангфэла (1969), твораў Ясеніна, Маякоўскага, Твардоўскага, Ісакоўскага і іншых. Моўная палітра вельмі багатая, ён перакладаў з рускай, украінскай, англійскай, іспанскай, яўрэйскай і іншых моў. Раздзел выставы аб жыцці і творчасці А.Куляшова прадэманструе літаратурную крытыку і асноўныя напрамкі даследавання яго літаратурнай спадчыны.Падчас мерапрыемства адбудзецца відэапрэзентацыя матэрыялаў выставы, падрыхтаванай Дзяржаўным музеем гісторыі беларускай літаратуры, на якой будуць прадстаўлены рукапісы, нататнікі, узнагароды і іншыя асабістыя рэчы народнага паэта Беларусі.У вечарыне прымуць удзел родныя і сябры Аркадзя Куляшова, даследчыкі і пісьменнікі. У межах мерапрыемства плануецца выступленне фальклорнага ансамбля "Ліцвіны" пад кіраўніцтвам унука А.Куляшова Уладзіміра Берберава, прэзентацыя малюнкаў пачынаючай мастачкі Алесі Іса, праўнучкі А.Куляшова, а таксама паказ урыўка са спектакля "Майго юнацтва крылы" ў выкананні артыстаў ТЮГа.Месца правядзення: Цэнтральная навуковая бібліятэка імя Якуба Коласа НАН Беларусі (вул. Сурганава, 15, інфармацыйна-выставачны цэнтр, 1 паверх, п. 110).
link	камэнтаваць

"А ўсё таму, што родам з лістападу..."	[Nov. 13th, 2013|02:55 pm]Вершы
[**Tags**|рэкляма]20 лістапада а 16-й гадзіне ў рамках праекта "Апякункі паэтычных нябёсаў" адбудзецца вечарына "А ўсё таму, што родам з лістападу...", прысвечаная 65-годдзю вядомай беларускай паэтэсы Яўгеніі Янішчыц. Арганізатарамі мерапрыемства выступілі Дзяржаўны музей гісторыі беларускай літаратуры і Цэнтральная навуковая бібліятэка імя Якуба Коласа НАН Беларусі."Непрыручанай птушкай" Палесся засталася яна ў свядомасці многіх. Я.Янішчыц жыла заўсёды на мяжы двух светаў: рэальнага і ўяўнага. Талент "Палесскай ластаўкі" сягаў высока ў неба, у той жа час як душа была злучана з зямлёю, сваім краем, з роднымі мясцінамі. Радзіма, Беларусь, дзяцінства – вось тыя крыніцы, якія поўнілі духоўнай энергіяй яе лірыку. Па словах Васіля Быкава, "Жэня была самая таленавітая з усіх самых таленавітых паэтэс Беларусі, самая цнатлівая і дасканалая".Адной з лепшых старонак беларускай паэзіі стала інтымная лірыка Я.Янішчыц, у ёй найбольш выразна раскрылася незвычайнае духоўнае святло чалавечай і творчай асобы. Як адзначыў Васіль Жуковіч, "...Жэня здолела перадаць складаны і зменлівы стан чалавечай душы, дзе сутыкаюцца святло і морак, захапленне і расчараванне, радасць і туга, надзея і адчай. Усё ў яе творах глыбока ўражвае".Да мерапрыемства бібліятэка падрыхтавала выставу "Пачынаецца ўсё з любві…", якая пазнаёміць з творчай спадчынай нашай славутай паэтэсы: першыя публікацыі ў літаратурных зборніках, першыя паэтычныя зборнікі "Снежныя грамніцы" (1970), "Дзень вечаровы" (1974). Сярод экспанатаў выставы і апошнія кнігі Я.Янішчыц ("Каліна зімы", "У шуме жытняга святла"), сучасные публікацыі, перавыданні яе твораў. Яе вершы перакладзены на англійскую, балгарскую, грузінскую, літоўскую, рускую, нямецкую, французскую і іншыя мовы свету, але Я.Янішчыц і сама была цікавым перакладчыкам. На выставе будуць прадстаўлены яе пераклады на беларускую мову твораў рускіх, украінскіх аўтараў, а таксама літаратурна-крытычныя артыкулы Я.Янішчыц. Асобны раздзел выставы прысвечаны жыццёваму і творчаму шляху паэтэсы.У праграме мерапрыемства — выступленні родных, сяброў, аднакурснікаў, калег, добрых знаёмых Яўгеніі Янішчыц. Творы паэтэсы будуць гучаць ў выкананні заслужанай артысткі Беларусі, адной з вядучых актрыс Тэатра юнага гледача — Ларысы Горцавай, песні на словы Я.Янішчыц выканае лаўрэат міжнароднага конкурса імя Г.Герман Надзея Бронская.Месца правядзення: Цэнтральная навуковая бібліятэка імя Якуба Коласа НАН Беларусі (вул. Сурганава, 15, інфармацыйна-выставачны цэнтр, 1 паверх, п. 110).
link	камэнтаваць

"Ёсць Чалавек. Ёсць свет і дабрыня…"	[Oct. 8th, 2013|11:17 am]Вершы
[**Tags**|рэкляма]11 кастрычніка а 16-й гадзіне адбудзецца вечарына "Ёсць Чалавек. Ёсць свет і дабрыня…", прысвечаная 100-годдзю з дня нараджэння паэткі Эдзі Агняцвет. Арганізатарамі мерапрыемства выступілі Дзяржаўны музей гісторыі беларускай літаратуры і Цэнтральная навуковая бібліятэка імя Якуба Коласа НАН Беларусі.Аўтар паэтычных зборнікаў "Маё пакаленне", "Беларуская рабіна", "І смутак, і святло", кніг паэзіі для дзяцей "Краіна маленства", "Мы сур'ёзныя, мы вясёлыя", "Доктар Смех", "Ад зярнятка да вясёлкі", "Хто пачынае дзень?", "На двары алімпіяда?" і інш. Шматлікія яе вершы былі пакладзены на музыку. Сярод іх вядомыя песні – "Міша Камінскі", "Фіялкі", "Мы яшчэ сустрэнемся", "Зямля з блакітнымі вачамі" і інш. Перакладала на беларускую мову творы С.Міхалкова, І.Такманавай, П.Ж.Беранжэ, А.Экзюперы, Г.Апалінэра і інш. Узнагароджана міжнародным Ганаровым дыпломам імя Х.-К.Андэрсена за кнігу вершаў і перакладаў для дзяцей "На двары алімпіяда".Да імпрэзы бібліятэка падрыхтавала выставу "Гэта – і сэрца і розум, неба мае і зямля", на якой прадстаўлены асноўныя творы Э.Агняцвет. Пад час мерапрыемства адбудзецца адкрыццё літаратурна-дакументальнай выставы з фондаў Дзяржаўнага музея гісторыі беларускай літаратуры, дзе будуць прадстаўлены нататнікі, рэдкія фотаздымкі, кнігі з аўтографамі, цікавыя лісты да Э.Агняцвет ад сяброў, блізкіх людзей і калег па творчасці, перададзеныя пісьменніцай у фонды музея. Упершыню будуць дэманстравацца альбомы з малюнкамі вучняў па творах Э.Агняцвет. Дзяржаўны музей гісторыі беларускай літаратуры запрашае паўдзельнічаць у мерапрыемстве выпускнікоў 1976 года СШ г. Мінска № 93 і № 100.У праграме вечара запланавана прэзентацыя кнігі твораў Э.Агняцвет, што друкаваліся на старонках часопіса "Вясёлка", выступленні вядомых беларускіх пісьменнікаў, навукоўцаў, родных паэткі. Пад час мерапрыемства ў запісе прагучаць музычныя творы на словы Э.Агняцвет. Самых актыўных і кемлівых чакаюць падарункі-агняцвецікі і сюрпрызы ад часопіса "Вясёлка".Месца правядзення: Цэнтральная навуковая бібліятэка імя Я.Коласа НАН Беларусі (вул. Сурганава, 15, інфармацыйна-выставачны цэнтр, 1 паверх, п. 110)
link	камэнтаваць

"Сяргей Грахоўскі. Я ўсё спазнаў..."	[Sep. 20th, 2013|11:40 am]Вершы
[**Tags**|рэкляма]26 верасня а 16-й гадзіне ў Цэнтральнай навуковай бібліятэцы імя Якуба Коласа Нацыянальнай акадэміі навук Беларусі адбудзецца вечарына "Сяргей Грахоўскі. Я ўсё спазнаў...", прысвечаная 100-годдзю з дня нараджэння вядомага паэта, празаіка, публіцыста, перакладчыка. Арганізатарамі мерапрыемства выступілі Дзяржаўны музей гісторыі беларускай літаратуры і Цэнтральная навуковая бібліятэка імя Якуба Коласа НАН Беларусі.Жыццё паэта – вялікае, трагічнае і прыгожае, знітаванае з жыццём і выпрабаваннямі Бацькаўшчыны на нялёгкіх, пакручастых шляхах нашай гісторыі. Двойчы кіданы ў пекла ГУЛАГу, Сяргей Грахоўскі, не гледзячы ні на што, застаўся беларусам, чалавекам і паэтам. Зона маўчання асабіста для паэта цягнулася больш трыццаці гадоў, бо свой першы верш ён напісаў у 1926 г., а першая кніга выйшла толькі ў 1958 г. Тым не менш паэзія Грахоўскага – жыццесцвярджальная, напоеная дабрынёй, цяплом і чысцінёй.Бібліятэка да імпрэзы падрыхтавала выставу "…Ад слова свеціцца жыццё". На творчым рахунку Сяргея Грахоўскага больш 60 кніг – лірыкі, аповесцяў і апавяданняў, публіцыстыкі, нарысаў і ўспамінаў, мастацкіх перакладаў, твораў для дзяцей. На выставе будут дэманстравацца і самыя першыя зборнікі "Дзень нараджэння" (1958), "Чаканне" (1960), "Голас сэрдца" (1962) і іншыя выданні. Асобным разделам прадстаўлена літаратура аб жыцці і творчасці паэта.Дзяржаўны музей гісторыі беларускай літаратуры ўпершыню прадставіць экспазіцыю з фондаў музея і сямейнага архіва Грахоўскіх, якую складаюць фатаздымкі, рукапісы, асабістыя рэчы Сяргея Іванавіча Грахоўскага.На сустрэчу запрошаны родныя Сяргея Грахоўскага, блізкія сябры, калегі па пяру, даследчыкі творчасці пісьменніка.Месца правядзення: Цэнтральная навуковая бібліятэка імя Якуба Коласа Нацыянальнай акадэміі навук Беларусі (вул. Сурганава, 15, інфармацыйна-выставачны цэнтр, 1 паверх, п. 110).
link	камэнтаваць