Tres (original) (raw)
Na Galipedia, a Wikipedia en galego.
O tres (3) é o número natural que segue ao dous e precede ao catro.
O 3 é o segundo número primo e o primeiro número primo impar. Ademais, é o primeiro número primo de Fermat (n = 0). É o segundo número primo de Sophie Germain.
O 3 tamén é o segundo número triangular, despois do 1 e antes do 6.
O 3 é o cuarto termo da serie de Fibonacci, despois do 2 e antes do 5.
Se se multiplica un número por tres obtense o triplo dese número; mentres que se se divide por tres obtense un terzo. O cubo dun número (o devandito número multiplicado 3 veces por si mesmo) represéntase co 3 como expoñente, como en _n_3.
Un número natural é divisible entre 3 se a suma dos seus díxitos é divisible entre 3. Por exemplo, o número 21 é divisible entre 3 e a suma dos seus díxitos é 2+1 = 3. Este proceso pode repetirse cantas veces sexa necesario (exemplo: 16 893 702 suma 36, 3+6 = 9, que é claramente divisible entre 3). Debido a isto, a reversión de calquera número que é divisible entre tres (ou na súa falta, calquera permutación nos seus díxitos) é tamén divisible entre 3. Así, 1368 e o seu reverso 8631 son ambos os dous divisibles entre 3 (1+3+6+8 = 18), así como os 1386, 3168, 3186, 3618 etc.
En moitas culturas o 3 represéntase mediante tres puntos, como no caso da numeración maia, ou mediante tres trazos (horizontais ou verticais). Por exemplo, na numeración romana (III) e na numeración chinesa (三).
Tres son os ideais da Revolución Francesa, Liberdade, Igualdade e Fraternidade
Existen famosas triloxías literarias, entre elas as de Paul Auster e William Burroughs. O señor dos aneis foi publicada como triloxía aínda que non era esa a intención do seu autor.
Son triloxías famosas no cine Back to the Future e O Padriño.
En Vietnam crese que dan mala sorte as fotografías de tres persoas.
Os Nazis chamaron Terceiro Reich a Alemaña, pretendendo que os dous primeiros foran o Imperio Romano e o Imperio de Prusia.
Os tsares chamaron a Moscova a terceira Roma, seguindo a Constantinopla.
Son necesarios e suficientes 3 puntos para determinar unha superficie plana.
Existen varios prefixos que significan tres e participan na construción dunha gran cantidade de palabras de uso cotián: ter e tri, como en terna e trindade.
Na cultura medieval cristiá é un número perfecto. Simboliza o movemento continuo e a perfección do acabado, así como símbolo da Trindade.