Azrem (original) (raw)
Si Wikipedia, tasanayt tilellit.
| Azrem | |
|---|---|
| Tasensartut | |
| Tagelda | Animalia |
| Adur | Chordata |
| Asmil | Reptilia |
| Tafesna | Squamata |
| adu-tfesna | SerpentesLinnaeus, 1758 |
| Taẓuni tarakalt | |
 |
|
| Isali amatan | |
| Taɣbalut | viande de serpent (fr)  |
Azrem (asget: izerman) d aɣersiw amrarad n tit idammen isemmaṭen yeṭṭafar adu-tfesna n tzermatin deg tfesna n tmeskebrin.
tafekka n wezrem d tusdidt (tarqaqt) d taɣezfant, ur tli ara (tesɛi) iḍarren, imeẓẓuɣen, taɣect, wala irgalen. Llant 19 n twaculin n yizerman yerna ass-a, ttwassnen 2.900 n telmasAmur ameqran seg yizerman tteddren deg tmura izeɣlen. Aglim-nsen d alewwaɣ yerna tdel-it tekbert. Izerman lan iẓri igerrzen, yerna ssuffuɣen-d iles-nsen akken ad fruyen i wemṭa n uzwu, imi s yiles-nsen ay zemren ad fruyen i wsekdu n wayen ay d-yezzin fell-asen. Amur ameqran seg telmas n yizerman tteddren ɣef wakal, maca llan-t kra n telmas ay itteddren deg waman, yerna llan ula d wid ay itteddren ddaw wakal. Izerman, am yekk tilmas n timeskebtin (tizermemmuyin, ifekren...atg) usren (ḥwajen) ad ssiẓnen tafekka-nsen i tfukt, acku idammen-nsen d isemmaṭen akken i yusren ad srekden taẓɣelt-nsen.
Tilmas n yizerman d tid yemgaraden deg tleɣwa, inan yakk d tkelli. Kra n yizerman lan inan imsullsen (am uberkan, ademdam d waras) yerna sseqdacen inan ayi akken ad sdergen iman-nsen deg twennaḍt i sen-d-izzin. Maca izerman ay izewwqen s yinan izurirɣen (am uwraɣ neɣ neɣ amellal neɣ azewwaɣ) zemren ad ilin d tilmas ilan iriren iteɣɣen, seqdacen inan-nsen d awelleh akken ur d-ttqerriben ɣer-sen yiɣersiwen ara ten-yeččenn.
Simal yettimɣur wezrem, simal yettbeddil aglim-nnes, dɣa yettajja aglim-nni aqbur (umi ɣɣaren "tislest"), yerna yettbeddil-d wayeḍ. I wakken ad ibeddel wezrem tislest-nnes, yettḥukku iɣef-nnes ɣer kra n tɣawsa taḥercawt (am weẓru neɣ asɣar). D aya ara t-yejjen ad yesseqdec tislest-nni-nnes, sakkin, azrem yettkemmil yettḥukku iman-nnes arma yessenser-d tafekka-nnes seg weglim-nni aqbur.
Tilmas n yizerman s umata ttidiren s wegmar n yiɣersiwen niḍen. Kra n yizerman teqqsen iɣersiwen igemmren, yerna neɣɣen-ten s yiriren i d-itekken seg yeckaren yellan deffir wuglan-nsen. Mara ad ṭṭfen aɣersiw s wuglan-nsen, ad as-gren iriren s agensu (daxel) n tfekka-nnes. Izerman lemmẓen (sseblaɛen) učči-nsen ɣef tikkelt yerna war tuffẓa. Mi ara yili uɣersiw-nni meqqer, azrem yezmer ad yessenṣel igumas-nnes yerna ad yesnejbad imi-nnes anect n uɣersiw-nni ara yečč. Izerman tteddun s udemmer akked uzuɣer n tfekka-nsen, s tmeẓwalin ilan deg idisen-nsen, yerna zemren ad ddun s tazzla ɣef s tarrayt nni. Mi yelmeẓ wezrem tagemrawt-is, ad teqqim deg tfekka-ines alamma yeẓda-tt yiliwi-ines. Amur ameqran seg yizerman gemmren iɣersiwen meẓẓiyen i d-ttafen deg wakal am yiɣerdayen, tizermemmuyin neɣ igra d yimqerqar. Izerman n waman ttetten daɣen iselman. Ɣas ma yella izerman ttetten aṭas, maca zemren daɣen ad allen (ad ṣebren) i laẓ. Kra n medden ttṛebbin izerman deg wexxam (deg yisendyaq n wesmeɣ) yerna zemren ad ten-jjen ayyur war ma sseccen-ten.