religion – Lille norske leksikon (original) (raw)
Ritual er viktig i religion. Her feirar hinduistiske kvinner bhaiyaduj i Varanasi, India. Formålet med ritualet er å styrkje forholdet mellom søsken.
Religion er ei samling av tru, handlingar og levereglar som fleire menneske deler. Det kan vere tru på éin eller fleire gudar, eller andre overnaturlege krefter eller vesen. Det å tru på, eller å høyre til, ein religion heiter å vere religiøs.
Studiet av religionar blir kalla religionsvitskap.
Religionen handlar om det menneska ser på som heilagt, sant, andeleg eller guddommeleg. I fleire religionar er levereglar òg ein viktig del av religionen. Det er vanlig å tru at dei blei gjevne til menneska av ein guddom, gjennom ein bestemt person, til dømes Moses eller Muhammed.
Felles for religionar
Trua på éin eller fleire gudar er viktig i mange religionar. Her frå eit buddhistisk tempel på Sri Lanka.
Det er sju ting som dei fleste religionar har felles:
- Ritual (symbolske handlingar dei religiøse gjer aleine eller i fellesskap).
- Opplevingar og kjensler.
- Forteljingar og mytar.
- Førestillingar om korleis verda vart til, korleis ein skal leve, og kva som skjer etter døden.
- Etikk (reglar for kva som er rett og gale).
- Eit sosialt fellesskap.
- Bygningar, kunst, gjenstandar, stader eller personar som er viktige for religionen.
Det er ulikt kor viktige dei forskjellige punkta er i ulike religionar, og i ulike retningar innan same religion. I nokre religionar er det viktigast kva ein sjølv føler og trur. Slik er det i fleire protestantiske kristne samfunn. I mange andre religionar er det minst like viktig å følgje bestemde levereglar. Det kan til dømes vere kva tider ein skal be, kva ein kan ete eller kva klede ein skal bruke.