Ambás y Ramsés compartieron la cultura asturiana n'Etiopía - Musicasturiana.com (original) (raw)

Los músicos y investigadores de la tradición oral asturiana, Xosé Antón «Ambás» y Ramsés Ilesies tán acabante llegar d’Adis Ababa, capital d’Etiopía, onde participaron en dellos talleres dedicaos a la música tradicional y a la tradición oral. L’**_Agencia Española de Cooperación Internacional para el Desarrollo_**, la Embaxada d’España n’Etiopía y la Yared Music School entamaron ente’l 21 y el 24 de payares estes xornaes nes que la música, el baille y los instrumentos d’Asturies y Etiopía interrellacionáronse.

«Fai un mes y mediu ḷḷamóunos por mediación de Rodrigo Cuevas la Cooperación Española n’Etiopía pa ufrinos la posibilidá de dar unas conferencias participativas alredor del conceutu de música tradicional ya la sua recochida, amás d’unos talleres de percusión ya baiḷḷe del país», desplica Ilesies na so cuenta d’Instagram. La so participación foi amás con una filosofía clara, como apunta’l músicu y investigador de la tradición: «Fomos cola idea de poder faer improvisaciones ya actividades conxuntas, pa que nun tuviera un tufu colonial ya faltu de respetu (que nun yá oxetivu d’estos programas nin muitu menos) ya asina poder cunta-ḷḷys la nuesa esperiencia por se de dalgo-ḷḷys podía servire; interactuare de tu a tu ya ensin remilgos».

Ellí baillaron dances asturianes y etíopes, tocaron instrumentos de los dos países, aldericaron sobre la importancia de caltener la cultura tradicional de cada territoriu… Nes xornaes participaron tamién artistes profesionales del país africanu como’l músicu Haddis Alemayehu y el danzador Junaid Jemal Sendi, amás d’amateurs «miembros de las formaciones de los anteriores, ya maestrxs ya escolinxs del Yared Music School, conservatoriu d’Adis Ababa».

Diálogu intercultural

«Pa min foi un shock cultural, económicu, políticu… foi máxicu», conclúi Ramsés Ilesies na so publicación de redes sociales amosando’l so agradecimientu cola iniciativa. Propuestes como estes amuesen el valor y la capacidá d’esportación de la cultura asturiana, amás de la importancia que supón afondar nel diálogu intercultural ente pueblos n’igualdá.