kommensalisme – Store norske leksikon (original) (raw)
Kommensalisme er ei form for samliv mellom to artar, der den eine organismen (kommensalen) har ein fordel av samlivet, medan den andre (verten) ikkje blir påverka (korkje positivt eller negativt).
Faktaboks
av fransk, eigentleg ‘ein som et ved det same bordet’
Eit godt døme på kommensalisme er dei mange ikkje-sjukdomsframkallande bakteriane som lever på huda vår. Dei får ein stad å bu og næring i form av til dømes olje frå huda, men vi blir ikkje påverka av at dei er der. Små blomeplantar som ikkje toler sterk sol og difor lever i skuggen av store tre, er også kommensalar, fordi trea ikkje blir påverka av blomeplantane. Epifyttar som lever på tre, vil også vera kommensalar så lenge dei ikkje skader trea. Her er det viktig å skilja mellom epifyttar, som veks på andre plantar utan å skada eller ta næring frå verten (døme på kommensalisme), og snylteplantar, som snyltar på verten dei veks på, og tek næring frå dei (døme på parasittisme, ikkje kommensalisme).
Kommensalisme er rekna som vanleg i naturen, men er vanskeleg å påvise ettersom det er svært vanskeleg å vise at kommensalen ikkje har nokon positive eller negative effektar på verten.