Jacqueline Boitte (original) (raw)
Jacqueline Boitte, c' est ene sicrijheuse e walon do payis d' El Lovire.
Elle a stî relîte dins l' Antolodjeye Scrire et dins «Vint-cénk escrijheus e walon ås deus Inne».
Elle a cmincî pa scrire pol teyåte; et djouwer; ey essinner.
Si pîce «Eliza e-n imådjes» a rascodou li Cope do Rwè e 1994.
Sicrijheuses di noveles come "Muroe eschårdé", ki wangna l' Pris Walla e 1997.
Ses powinmes sont-st eplaidîs dins l' Moxhon d' ônea et dins l' Bourdon. Elle endè rashonna sacwants dins l' ramexhnêye "Cour å lådje" eplaideye e 2011.
Elle a siné onk des bokets do live Voyaedje ezès payis d' oyi.
Ses powinmes sont soeye-t i des arimés, soeye-t i des libes vers. Ele ricnoxhe aveur prins modele so Félix Duval.[1]
Ses tinmes sont sovint poujhîs dins les (mwaijhès) noveles des posses et gazetes. Come:
- li stofaedje d' ene abagante revoyeye dins s' payis på policî metou avou lu dins l' avion k' el reminéve.
- li saye di touwaedje d' on djwif pa on djonnea d' cwénze ans (1916).
Cwénze ans!
Èn efant,
Djusse èn efant
On gamén
Mierseu dins s' tchambe,
Sins aresse aclapé
A s' waitroûle,
Å rcoe do vraiy monde,
Si lon del vraiye veye.
Pont d' amisses
Po discandjî des idêyes
Po pårtaedjî des plaijhis
Avou zels;
Et rire ey esse el fiesse;
S' emayî des beatés do monde.
On gamén
Epansné des fayêyès imådjes,
Des fåssès paroles
Des moudreus dimindjîs
Pa l' eveye di mori.
On gamén
A volou touwer èn ome,
On djwif.
Kimint wårder l' espwer,
Cwand l' istwere n' è finit pus
Di rcomincî,
Et ki tot shonne s' endaler
Al disblouke.
L' amour, putete...
Ès bate eyet djurvi...surmint
Ene pådje di ses scrijhaedjes (so l' Aberteke)
- ↑ El Bourdon 638, moes d' setimbe 2011
- ↑ El Mouchon d'Aunia, måss 2016.