Qazanlılar Yıraq Şärıqqa tağın 3 oçqıç yasap cibäräçäk (original) (raw)

Qazanda inde 8 mart – Xalıqara xatın-qızlar könenä äzerlek tä başlandı. 2 martta Qazan milli-mädäni üzägendä şähärneñ xatın-qızlar ictimaği oyışması wäkilläre cıyıldı. Anda yaqınlaşıp kilüçe bäyräm çaraları turında söyläştelär, Qazanda daimi uzdırıla torğan Yıl xatın-qızı häm ir atı – xatın-qızlar küzlegennän digän bäygeneñ näticälären yasadılar. Bäygedä ciñüçelär arasında 2 sanlı tatar gimnaziäse direktorı, tatar xatın-qızları oyışmasınıñ citäkçese Kämäriä Xämidullina da bar. Ciñüçelärne Mintimer Şäymiev isemennän xatın-qızlar bäyrämenä bağışlap oyıştırıla torğan tantanalı kiçädä büläkliäçäklär. Älege çara 4 mart könne Piramida küñel açu üzägendä ütäçäk. Bıyıl inde sigezençe märtäbä anda respublikanıñ iñ bilgele, tırış, xörmätkä layıqlı meñnän artıq güzäl zatı cıyılaçaq.

Läkin bäyräm yaqınlaşuğa da qaramastan, eş tä onıtılmıy. Mäsälän, Qazannıñ aviatözüçeläre Yıraq Şärıq öçen tağın 3 oçqıç yasap biräçäk. Bu xaqta Mäskäwdä Tatarstan prezidentı Mintimer Şäymiev belän Xabarovski ölkäse gubernatorı Viktor İşaev arasındağı oçraşuda söyläşengän. Yaña TU-214 inde bıyıl uq citeşterelep cibäreläçäk. Alarnı berse inde aprel’ ayında uq äzer bulaçaq, dip yaza Kommersant gäcite. 2 mart könne respublikanıñ farmatsevtika oyışmaları wäkilläre bergä cıyılıp kiläçäkkä olannarın tikşerdelär. Ä Qazan yärminkäsendä çärşämbedä Elemtä-2005 digän maxsuslaştırılğan kürgäzmä açıldı, dip xäbär itä Tatar-infoam agentlığı.

Bu könnärdä respublikanıñ xökümät wäkilläre soñğı aralardağı aktual’ mäs’älälär belän tanıştırunı däwam itälär. Mäsälän, sişämbe könne Ministrlar Kabinetında Tatarstannıñ cir häm milek mönäsäbätläre ministrı urınbasarı İldar Xäyrullov jurnalistlarğa respublikada cir reformasınıñ üzençälekläre turında söyläde. Tatarstanda 470 meñ cir öleşenä iä keşe bar. Xäzerge köndä aktiv räweştä alardan älege öleşlärne satıp alu kampaniäse bara ikän. İldar Xäyrullov şuşı nisbättän üzläreneñ borçıluın belderde häm xalıqnı berniçä meñ sum aqçağa qızığıp, cirlären satmasqa öndäde.

Gölnaz İlgizär