ഇംഗ്ലണ്ടിനെതിരായ ട്വന്റി20 പരമ്പരക്കുള്ള ഇന്ത്യന്‍ ടീമിനെ പ്രഖ്യാപിച്ചു; വിക്കറ്റ് കീപ്പറായി സഞ്ജു ടീമില്‍ തുടരും (original) (raw)
Chandrika Daily
ഇംഗ്ലണ്ടിനെതിരായ ട്വന്റി20 പരമ്പരക്കുള്ള ഇന്ത്യന്‍ ടീമിനെ പ്രഖ്യാപിച്ചു; വിക്കറ്റ് കീപ്പറായി സഞ്ജു ടീമില്‍ തുടരും
Sports
പേസര്‍ മുഹമ്മദ് ഷമി ഒരു വര്‍ഷത്തെ ഇടവേളക്കുശേഷം ടീമിലേക്ക് മടങ്ങിയെത്തി
ഇംഗ്ലണ്ടിനെതിരായ ട്വന്റി20 പരമ്പര മത്സരങ്ങളിലേക്കുള്ള ഇന്ത്യന്‍ ടീമിനെ പ്രഖ്യാപിച്ചു. മുഖ്യ വിക്കറ്റ് കീപ്പറായി മലയാളി താരം സഞ്ജു സാംസണ്‍ ടീമില്‍ തുടരും. സൂര്യകുമാര്‍ യാദവ് പടനയിക്കും. അക്‌സര്‍ പട്ടേല്‍ വൈസ് ക്യാപ്റ്റനാകും. പേസര്‍ മുഹമ്മദ് ഷമി ഒരു വര്‍ഷത്തെ ഇടവേളക്കുശേഷം ടീമിലേക്ക് മടങ്ങിയെത്തി.
15 അംഗ ടീമിനെയാണ് അഞ്ചു മത്സരങ്ങളടങ്ങിയ പരമ്പരക്ക് ബി.സി.സി.ഐ പ്രഖ്യാപിച്ചത്. പരിക്ക് മാറി രാജ്യാന്തര ക്രിക്കറ്റില്‍ പന്ത് സജീവമായെങ്കിലും ട്വന്റി20യില്‍ സഞ്ജു തന്നെ തുടരട്ടെയെന്ന് തീരുമാനിക്കുകയായിരുന്നു. ധ്രുവ് ജുറേലാണ് ബാക്ക് അപ്പ് വിക്കറ്റ് കീപ്പര്‍. നിതീഷ് റെഡ്ഡിയും ട്വന്റി20 ടീമിലെത്തിയിട്ടുണ്ട്.
ജനുവരി 22ന് കൊല്‍ക്കത്തയിലെ ഈഡന്‍ ഗാര്‍ഡനിലാണ് ആദ്യ മത്സരം. 25ന് ചെന്നൈ, 28ന് രാജ്‌കോട്ട്, 31ന് പുണ, രണ്ടിന് വാങ്കഡെ എന്നിവിടങ്ങളിലും മത്സരങ്ങള്‍ നടക്കും. ഇംഗ്ലണ്ടിനെതിരെ മൂന്നു ഏകദിന പരമ്പയും കളിക്കുന്നുണ്ട്.ശനിയാഴ്ച വൈകീട്ടാണ് ബി.സി.സി.ഐ ആസ്ഥാനത്ത് സെലക്ഷന്‍ കമ്മിറ്റി യോഗം ചേര്‍ന്നത്.
ഇന്ത്യന്‍ ടീം: സൂര്യകുമാര്‍ യാദവ് (ക്യാപ്റ്റന്‍), സഞ്ജു സാംസണ്‍, അഭിഷേക് വര്‍മ, തിലക് വര്‍മ, നിതീഷ് റെഡ്ഡി, മുഹമ്മദ് ഷമി, അര്‍ഷ്ദീപ് സിങ്, ഹര്‍ഷിത് റാണ, ധ്രുവ് ജുറേല്‍, റിങ്കു സിങ്, ഹാര്‍ദിക് പാണ്ഡ്യ, അക്‌സര്‍ പട്ടേല്‍, രവി ബിഷ്‌ണോയ്, വരുണ്‍ ചക്രവര്‍ത്തി. വാഷിങ്ടണ്‍ സുന്ദര്‍.
Sports
പ്രീമിയര്‍ ലീഗില്‍ സമനിലയില്‍ കുടുങ്ങി വമ്പന്മാര്‍
ലിവര്‍പൂള്‍, ചെല്‍സി, മാഞ്ചസ്റ്റര്‍ സിറ്റി തുടങ്ങിയ കരുത്തര്‍ക്കെല്ലാം സമനിലകൊണ്ട് ഒതങ്ങേണ്ടിവന്നു
Published
2 hours ago
on
January 15, 2025
ലണ്ടന്‍: പ്രീമിയര്‍ ലീഗില്‍ ലിവര്‍പൂള്‍, ചെല്‍സി, മാഞ്ചസ്റ്റര്‍ സിറ്റി തുടങ്ങിയ കരുത്തര്‍ക്കെല്ലാം സമനിലകൊണ്ട് ഒതങ്ങേണ്ടിവന്നു. നോട്ടിങ്ഹാമിന്റെ സിറ്റി ഗ്രൗണ്ടില്‍ നടന്ന മത്സരത്തില്‍ ഒന്നാം സ്ഥാനക്കാരായ ലിവര്‍പൂളിനെ 1-1ന് പൂട്ടി നോട്ടിങ്ഹാം ഫോറസ്റ്റ് പോയിന്റ് പട്ടികയില്‍ ആഴ്‌സനലിനെ പിന്തള്ളി രണ്ടാം സ്ഥാനത്തെത്തി. എട്ടാം മിനിറ്റില്‍ ക്രിസ് വുഡാണ് നോട്ടിങ്ഹാമിനായി വലചലിപ്പിച്ചത്. രണ്ടാം പകുതിയില്‍ 66ാം മിനിറ്റില്‍ ഡീഗോ ജോട്ടയുടെ ഗോളിലൂടെയാണ് ലിവര്‍പൂള്‍ മറുപടി ഗോള്‍ നേടിയത്.
മറ്റൊരു മത്സരത്തില്‍ ബേണ്‍മൗത്ത് 2-2ന് ചെല്‍സിയും സമനിലയിലെത്തി. ചെല്‍സിയാണ് 13ാം മിനിറ്റില്‍ കോള്‍ പാല്‍മറിന്റെ ഗോളിലൂടെ ആദ്യ ലീഡെടുക്കുന്നത്. 50ാം മിനിറ്റില്‍ ജസ്റ്റിന്‍ ക്ലുവര്‍ട്ട് പെനാല്‍റ്റിയിലൂടെ ഗോള്‍ തിരിച്ചടിച്ചു. (1-1). 68ാം മിനിറ്റില്‍ ചെല്‍സിയെ ഞെട്ടിച്ച് ആന്റണീ സെമന്‍യോ ബേണ്‍മൗത്തിനായി വലകുലുക്കി. ഒടുവില്‍ ്‌റീസ് ജെയിംസ് ചെല്‍സിയെ തോല്‍വിയില്‍ നിന്ന് രക്ഷിക്കുകയായിരുന്നു.
മാഞ്ചസ്റ്റര്‍ സിറ്റി- ബ്രെന്‍ഡ് ഫോര്‍ഡ് മത്സരം 2-2ന് അവസാനിച്ചു. 66, 78 മിനിറ്റുകളില്‍ ഫില്‍ ഫോഡന്‍ നേടിയ ഇരട്ടഗോളിന്റെ ബലത്തില്‍ 82 മിനിറ്റോളം മുന്നിട്ട് നിന്ന ശേഷമാണ് സിറ്റി ജയം കൈവിടുന്നത്. 82 ാം മിനിറ്റില്‍ യോനെ വിസ്സയും ഇഞ്ചുറി ടൈമില്‍ ക്രിസ്റ്റ്യന്‍ നോര്‍ഗാര്‍ഡും ഗോള്‍ നേടിയ ഗോളിലൂടെയാണ് ബ്രെന്‍ഡ്‌ഫോര്‍ഡ് സിറ്റിയെ കുരുക്കിയത്.
പ്രീമിയര്‍ ലീഗില്‍ 20 മത്സരങ്ങള്‍ പൂര്‍ത്തിയാക്കിയ ലിവര്‍പൂള്‍ 47 പോയിന്റുമായി ഒന്നാം സ്ഥാനത്താണ്. 21 മത്സരങ്ങളില്‍ നിന്ന് 41 പോയിന്റുമായി നോട്ടിങ്ഹാം രണ്ടാം സ്ഥാനത്ത് തുടരുന്നു. 20 മത്സരങ്ങളില്‍ നിന്ന് 40 പോയിന്റുമായി ആഴ്‌സനല്‍ മൂന്നാമതും 37 പോയിന്റുായി ചെല്‍സി നാലാമതുമാണ്. 35 പോയിന്റുമായി സിറ്റി ആറാമതാണ്.
News
കേരള ബ്ലാസ്റ്റേഴ്‌സ് മാനേജ്‌മെന്റിനെതിരെ കടുത്ത പ്രതിഷേധവുമായി മഞ്ഞപ്പട
മത്സരത്തിന് മുമ്പായി നാളെ പ്രതിഷേധ റാലി നടത്താനാണ് മഞ്ഞപ്പടയുടെ തീരുമാനം.
Published
3 days ago
on
January 12, 2025
കേരള ബ്ലാസ്റ്റേഴ്‌സ് മാനേജ്‌മെന്റിനെതിരെ കടുത്ത പ്രതിഷേധവുമായി ആരാധക കൂട്ടായ്മയായ മഞ്ഞപ്പട. മത്സരത്തിന് മുമ്പായി നാളെ പ്രതിഷേധ റാലി നടത്താനാണ് മഞ്ഞപ്പടയുടെ തീരുമാനം. വിമര്‍ശനങ്ങള്‍ ഉയര്‍ന്നിട്ടും തിരുത്താന്‍ മാനേജ്‌മെന്റ് തയ്യാറാവാത്തതാണ് പ്രതിഷേധം സംഘടിപ്പിക്കാനുള്ള നീക്കം. സ്റ്റേഡിയത്തിനകത്തും പ്രതിഷേധങ്ങള്‍ നടക്കാന്‍ സാധ്യതയുണ്ട്.
ഗേറ്റ് നമ്പര്‍ പതിനാറ് മുതല്‍ ക്ലബ് ഓഫീസ്, വി ഐ പി എന്‍ട്രന്‍സ് എന്നിവിടങ്ങളില്‍ പ്രതിഷേധം അറിയിച്ച ശേഷം സ്റ്റേഡിയത്തിന് ചുറ്റി, റാലി തിരിച്ച് ഈസ്റ്റ് ഗാലറി ഗേറ്റിനു മുന്നില്‍ അവസാനിക്കുന്ന രീതിയില്‍ ആണ് റാലി സംഘടിപ്പിക്കാന്‍ തീരുമാനം.
ബ്ലാസ്റ്റേഴ്‌സിന്റെ മോശ പ്രകടനത്തില്‍ മാനേജ്‌മെന്റിനെതിരെ സാമൂഹിക മാധ്യമങ്ങളിലൂടെ തുടങ്ങിയ പ്രതിഷേധം സ്റ്റേഡിയത്തിലേക്കും ഇരച്ചികയറുകയായിരുന്നു.
ലീഡേഴ്സ് ഓര്‍ ലയേഴ്സ് എന്ന് എഴുതിയ കറുത്ത ബാനറുമായാണ് ആരാധകര്‍ മുഹമ്മദന്‍സിനെതിരായ മത്സരത്തില്‍ എത്തിയത്. പഞ്ചാബ് എഫ്‌സിക്കെതിരായ മത്സരത്തിലും പ്രതിഷേധം തുടര്‍ന്നിരുന്നു.
മഞ്ഞപ്പടയുടെ നോര്‍ത്ത് വിംഗാണ് പ്രതിഷേധം സംഘടിപ്പിച്ചത്.
Football
എഫ്.എ കപ്പ്: എട്ടടിച്ച് സിറ്റി, ചെല്‍സിക്കും ലിവര്‍പൂളിനും മിന്നും വിജയം
അക്രിങ്ടണ്‍ സ്റ്റാന്‍ലിയെ നാലുഗോളുകള്‍ക്കാണ് ലിവര്‍പൂള്‍ പരാജയപ്പെടുത്തിയത്.
Published
3 days ago
on
January 12, 2025
എഫ്.എ കപ്പിന്റെ മൂന്നാം റൗണ്ടില്‍ മാഞ്ചസ്റ്റര്‍ സിറ്റിക്കും ചെല്‍സിക്കും ലിവര്‍പൂളിനും തകര്‍പ്പന്‍ വിജയം. സാല്‍ഫോര്‍ഡ് സിറ്റിയെ മാഞ്ചസ്റ്റര്‍ സിറ്റി എതിരില്ലാത്ത 8 ഗോളുകള്‍ക്കും മോര്‍കാമ്പയെ ചെല്‍സി എതിരില്ലാത്ത അഞ്ചുഗോളുകള്‍ക്കും തകര്‍ത്തു. അക്രിങ്ടണ്‍ സ്റ്റാന്‍ലിയെ നാലുഗോളുകള്‍ക്കാണ് ലിവര്‍പൂള്‍ പരാജയപ്പെടുത്തിയത്. ഫോമിലുള്ള നോട്ടിങ്ഹാം ഫോറസ്റ്റ് ല്യൂട്ടണ്‍ ടൗണിനെ എതിരില്ലാത്ത രണ്ടുഗോളുകള്‍ക്കും തോല്‍പ്പിച്ചു.
ജെയിംസ് മക്കാറ്റിയുടെ ഹാട്രിക്കും ജെര്‍മി ഡോക്കുവിന്റെ ഇരട്ടഗോളുകളും ഡിവിന്‍ മുബാമ, നിക്കോ ഒറേലി, ജാക്ക് ഗ്രീലിഷ് എന്നിവരുടെ ഗോളുകളുമാണ് സിറ്റിക്ക് ഗംഭീര വിജയം നല്‍കിയത്.
ജാവോ ഫെലിക്‌സിന്റെയും ടോസിന്‍ അഡറാബിയോയുടെയും ഇരട്ട ഗോളുകളും ക്രിസ്റ്റഫര്‍ എന്‍കുകുവിന്റെ ഗോളുമാണ് ചെല്‍സിക്ക് തകര്‍പ്പന്‍ വിജയം നല്‍കിയത്. ഡിയഗോ ജോട്ട, അലക്‌സാണ്ടര്‍ അര്‍നോള്‍ഡ്, ജെയ്ഡന്‍ ഡാന്‍സ്, ഫെഡറിക്കോ ചിയേസ എന്നിവരാണ് ലിവര്‍പൂളിന്റെ ഗോള്‍ നേട്ടക്കാര്‍.
ഇന്ന് നടക്കുന്ന മത്സരങ്ങളില്‍ ആഴ്‌സണലും മാഞ്ചസ്റ്റര്‍ യുനൈറ്റഡും നേര്‍ക്കുനേര്‍ പോരടിക്കും. ഗണ്ണേഴ്‌സ് തട്ടകമായ എമിറേറ്റ്‌സില്‍ ഇന്ത്യന്‍ സമയം 8.30നാണ് മത്സരം.