Bømlo-Nytt – Store norske leksikon (original) (raw)

Faktaboks

Offisielt namn

BØMLO-NYTT AS

Organisasjonstype

Aksjeselskap

Forretningsadresse

Bremnes

Stifta

1973

Dagleg leiar

Reidar Hystad

Styreleiar

Marit Kalgraf

Bømlo-Nytt er ei norsk lokalavis for Bømlo kommune i Vestland. Ho vart grunnlagt i 1973 og kjem ut i papirformat på Bremnes to gonger i veka og som dagleg oppdatert nettavis. Polaris Media er frå 2020 hovudaksjonær i Bømlo-Nytt. Avisa vert redigert på nynorsk, og er medlem av Landslaget for lokalaviser.

Digitalt

Bømlo-Nytt starta med nettutgåve som ei forsøksordning i 1997, og endra det til permanent ordning frå 1999. Betalingsmur for ikkje-abonnentar vart sett i verk i 2013. Det daglege talet på lesarar av papirutgåva og nettutgåva var i fjerde kvartal 2023 i gjennomsnitt 6313, ifølgje statistikk hos Mediebedriftenes Landsforening. Avisa har fleire podkastar.

Historie

Else-Marie Ovesen (f. 1932) hadde flytta frå Bergen til eit hus med berre éi buflate på Finnås, for å gjere forholda betre for hennar MS-sjuke ektemann. Fram til 1980 blei huset brukt som heimekontor. Mange middel blei tekne i bruk i konkurransen mellom Bømlo-Nytt og Bømlo i Tekst og Bilde. Ovesen bad innflytta ektefellar til medarbeidarar i BN om å ringe til BTB for å forhøyre seg om kva prisane for abonnement og annonsar ville bli det komande året. Sigve Sæverud, som fekk konkurransen i gang med etableringa av Annonseposten, er seinare engasjert som annonsekonsulent i Bømlo-Nytt.

Det vrimla av nye aviser etter EF-røystinga i 1972. Mange små stader fekk no aviser som skulle imøtekome trongen for lokal informasjon, og som kunne målbere lokalsamfunnet sine interesser. I denne tida hadde Else-Marie Ovesen (f. 1932) flytta frå Bergen til Finnås. Der fann ho ut at det lokale næringslivet på Bømlo mangla eit annonseorgan. Ovesen laga planar for å starte avis og fekk 6000 kroner i startstøtte frå kommunen. 30. august 1973 fekk bømlingane endeleg si eiga avis, og etter seks veker hadde Bømlo-Nytt fått over 1500 tingarar.

Ovesen var åleine om avisdrifta fram til våren 1974. Då var sonen Stein-Erik ferdig med artium og gjekk inn i avisa. I 1990 overtok han som redaktør. I den fyrste tida kom avisa ut berre éin gong i veka, men frå midten av 1970-talet kom ho ut onsdag og fredag. I 1979 fekk Bømlo-Nytt pressestøtte for fyrste gong. Avisa blei skriven i heimen til Ovesen, og trykt i Ytre Arna. I 1980 blei heimekontoret bytta ut med nybygde avislokale på Finnås.

Etter år med overskot kom det eit negativt skifte då Annonseposten blei etablert i 1989. Denne gratisavisa var driven av Sigve Sæverud, som var ein tidlegare journalist i Bømlo-Nytt. Våren 1993 valde Jan Harald Larsen å seie opp stillinga si som redaksjonssekretær i Bømlo-Nytt på grunn av misnøye med avisdrifta. 10. september 1993 kunne Larsen og Sæverud presentere Bømlo i Tekst og Bilete. Med seg på laget fekk dei to journalistar som hadde sagt opp stillingane sine i Bømlo-Nytt i mai 1993. Annonseposten gjekk inn i Bømlo i Tekst og Bilete.

Avislokala på Bremnes var eigde av Leif Georg Amundsen, som også hadde store eigarinteresser innan dykking, flyselskap, hotell. Etter kvart eigde han også heile Bømlo i Tekst og Bilete.

Bømlo i Tekst og Bilete ville vinne konkurransen med låge prisar, men Bømlo-Nytt svarte med same mynt. Då Bømlo i Tekst og Bilete ville auke til tre utgåver i veka, hadde Bømlo-Nytt fått nyss i planane. I fredagsavisa 26. november 1993 kunne difor begge avisene fortelje lesarane sine at dei ville kome med måndagsutgåver.

I 1996 byrja Bømlo-Nytt å tære på eigenkapitalen, og Bømlo i Tekst og Bilete gjekk med millionunderskot kvart år. Amundsen sine andre prosjekt byrja å gå svært dårleg, og i 1997 fekk han store problem med å skaffe midlar til Bømlo i Tekst og Bilete. Bømlo i Tekst og Bilete hadde berre eit opplag på om lag 1500, medan Bømlo-Nytt sitt var på knapt 4000. Det heile enda med at Bømlo-Nytt kjøpte Bømlo i Tekst og Bilete for 1 million kroner den 19. desember 1997, og Bømlo-Nytt har sidan vore åleineavis på Bømlo.

Opplag

Opplagstal for Bømlo-Nytt, 1986-2023

Kilde:medienorge.uib.no (papiropplag til 2014; deretter totalopplag, endring i beregningsmetode fra 2018)

Opplagstala til og med 2015 gjeld berre for papirutgåva. Frå 2020 reknar ein opplaget på grunnlag av både papirabonnement og digitalt abonnement, ifølgje Mediebedriftenes Landsforening.

Fakta

• Fyrste nummer 30. august 1973

Les meir i Store norske leksikon

Eksterne lenker

Faktaboks

Organisasjonsnummer

893171622

Sektorkode

2100 Private aksjeselskaper mv.

Næringskode(r)

58.130 Utgivelse av aviser

KulturNav-ID

d899799a-00c8-45a6-ad39-3a2fb7cb724f

Kommentarar