Olav T. Sandnes – Store norske leksikon (original) (raw)
Faktaboks
Olav T. Sandnes
Olav Terjeson Sandnes
Fødd
12. april 1972, Oslo
Olav T. Sandnes er administrerande direktør i TV 2 frå 2015.
Olav T. Sandnes er ein norsk siviløkonom og medieleiar. Sandnes er sjefredaktør og administrerande direktør i TV 2 AS og har vore administrerande direktør i Egmont Publishing.
Bakgrunn
Olav Terjeson Sandnes er fødd i Oslo. Han tok IB (International Baccalaureate) ved United World College of the Atlantic i Wales i 1991, bachelorgrad i økonomi ved Handelshøyskolen i København i 1995 og mastergrad i økonomi og leiing ved IESE Business School ved Universidad de Navarra i Spania i 1997.
Mediekarrieren
Olav T. Sandnes var tilsett i IT-selskapet Accenture i 1997–2005, i marknadsføringsbedrifta Eniro i 2005–2006, var finansdirektør i Funcom i 2006–2009 og finans- og strategidirektør i Hjemmet Mortensen i 2009–2011. Sandnes var administrerande direktør i Egmont Publishing frå 2011 og fram til han tok over som TV 2-sjef i 2015.
Sandnes har hatt mange styreverv. Han var medlem av styret i TV 2 fram til han blei direktør i 2015, og har vore styreleiar i Bladcentralen AS og Fagmedia AS, styremedlem i Mediebedriftenes Landsforbund og i Norsk Presseforbund. Han sit i konsernleiinga for Egmont, som er eigar av TV 2 frå 2015.