Sagvåg – Store norske leksikon (original) (raw)

Faktaboks

Innbyggjartal

3454 (SSB, 2023)

Landareal

2,7 km²

Tettstadsnummer

5056 Sagvåg

Sagvåg er ein tettstad i Stord kommune i Vestland. Tettstaden er ifølgje SSBs definisjon 2,7 km², og har 3454 innbyggjarar (2023).

Sagvåg ligg på sørvestsida av øya Stord. Til tettstaden blir òg rekna Litlabø ved Storavatnet med dei nedlagde Stordø Kisgruber, i drift i 1858–1968.

Sagvåg var utskipingshamn for gruvene. Før Trekantsambandet opna i 2001, hadde Sagvåg bilferjesamband til Bømlo. Tettstaden har ein del industri, mellom anna båtbyggjeri.

Namnet kan setjast i samband med skipinga av eit sagbruk (oppgangsag) på staden i siste del av 1500-talet; sisteleddet er våg, 'bukt'.