Jeanne d'Arc - H.Wallon - Appendice : Lettre du Roi d'Angleterre (3 janvier 1431) (original) (raw)

	Jeanne d'Arc par Henri Wallon - 5° éd. 1879 Appendice II-12 : Lettre du Roi d'Angleterre (3 janvier 1431)

« Henry, par la grâce de Dieu, roy de France et d'Angleterre,à tous ceulz qui ces présentes lettres verront, salut. Il est assez notoire et commun comment, depuis aucun temps en-ça, une femme qui se fait appeler Jehanne la Pucelle, laissant l'abbit et vesteure de sexe féminin, s'est, contre la loy divine, comme chose abhominable à Dieu, réprouvée et défendue de toute loy, vestue, habilée et armée en estat et habit d'omme; a fait et exercé cruel fait d'omicides, et, comme l'en dit, a donné à entendre au simple peuple pour le séduire et abuser qu'elle estoit envoyée de par Dieu, et avoit cognoissance de ses divins sécrez ; ensemble plusieurs dogmatizations très périlleuses, et à nostre sainte foy catholique moult préjudiciables et scandaleuses. En poursuivant par elle lesquelles abusions et exerçant hostilité à l'encontre de nous et nostre peuple, a esté prinse armée devant Compiengne, par aucuns de nos loyaulz subgez, et depuis amenée prisonnière par devers nous. Et pource que de superstitions, faulses dogmatizacions et autres crimes de lèse-majesté divine, comme l'en dit, elle a esté de plusieurs réputée suspecte, notée et diffamée, avons esté requis très instamment par révérend père en Dieu, nostre amé et féal conseiller, l'évesque de Beauvais,juge ecclésiastique et ordinaire de ladite Jehanne, pource qu'elle a esté prinse et appréhendée ès termes et limites de son diocèse ; et pareillement exortés de par nostre très chière et très amée fille l'Université de Paris, que icelle Jehanne veuillons faire rendre, bailler et délivrer audit révérend père en Dieu, pour la interroguer et examiner sur lesdiz cas, et procéder contre elle selon les ordenances et disposicions des droits divins et canoniques ; appeliez ceulx qui seront à appeller. Pource est-il que nous, qui pour révérence et honneur du nom de Dieu, défense et exaltacion de sadicte sainte Église et foy catholique, voulons dévotement obtempérer comme vrais et humbles filz de sainte Église aux requestes et instances dudit révérend père en Dieu, et exortacions des docteurs et maistres de nostre dicte fille l'Université de Paris : Ordenons et consentons que toutes et quantes fois que bon semblera audit révérend père en Dieu, icelle Jehanne lui soit baillée et délivrée réaiment et de fait par nos gens et officiers, qui l'ont en leur garde, pour icelle interroguer et examiner et faire son procès selon Dieu, raison et les saints canons.... Toutes voies, c'est notre entencion de ravoir et reprendre par devers nous icelle Jehanne, se ainsi estoit qu'elle ne fust convaincue ou actainte des cas dessusdiz, etc... »

« Donné à Rouen le tiers jour de janvier l'an de grâce MCCCCXXX [1431] et de nostre règne le IXe. »
(Procès, t. I, 3 janv. 1430 [1431], p. 18, 19.)

Source : Jeanne d'Arc - Henri Wallon - 5° éd. 1879.

Notes :
/