Samningen – avis – Store norske leksikon (original) (raw)

Faktaboks

Offisielt namn

SAMNANGER BLADLAG AS

Organisasjonstype

Aksjeselskap

Forretningsadresse

Årland

Dagleg leiar

Halvard Arne Tysse

Styreleiar

Vidar Haugen

Samningen er ei norsk lokalavis for Samnanger i Vestland som kjem ut på Årland kvar torsdag i papirformat og som dagleg oppdatert nettavis. Samningen er politisk uavhengig og vert gitt ut av Samnanger Bladlag. Samningen er medlem av Landslaget for lokalaviser.

Det første nummeret av Samningen kom ut 6. desember 1976. Den redaksjonelle målforma i Samningen er nynorsk.

Digitalt

Samningen publiserer stoffet på ulike digitale flater, og har innført betalingsmur for andre enn abonnentar som vil lese artiklar på nettet.

Historie

Samningen vart starta ved ein kombinasjon av personleg initiativ og lokal dugnadsånd. På eit folkemøte i november 1976 vart det vedteke å skipe eit bladlag som skulle gje ut lokalavis for Samnanger. Då laget vart skipa 10. februar 1977, hadde det 114 andelseigarar. Drivkrafta bak prosjektet var 23 år gamle Svein Oldervoll, medan onkelen Ivar Bård Aadland, som var formann i kulturstyret, var ein viktig støttespelar. Oldervoll var ikkje nøgd med at Samnanger var den einaste kommunen i området som ikkje hadde si eiga lokalavis.

Svein Oldervoll, som seinare tok etternamnet Aadland, var redaktør frå starten og fram til 1991. Den første tida redigerte Oldervoll avisa heime hos seg sjølv, sidan hos onkelen, som han overtok garden etter.

Dei tre første åra kom avisa ut kvar fjortande dag. Frå mars 1980 vart ho vekeavis, og har vore det sidan. Folketalet i Samnanger er omlag 2300, og det betyr at kommunen eigentleg er for liten til å ha ei eiga avis. Storparten av innbyggjarane bur inst i Samnangerfjorden, ein smal fjordbotn med fjell på alle kantar. Sentrum i kommunen ligg ein halvtimes køyretur frå Bergen, men fjell og tunnelar har gjort at Samnanger ikkje er blitt nokon forstad til Bergen. Bygdesamfunnet har dermed greidd å ta vare på den lokale identiteten.

Nytt utstyr

Drifta dei første åra var ei blanding av dugnadsinnsats og dårleg betalt deltidsarbeid. Skrivemaskin, fotoapparat og kopimaskin vart ikkje innkjøpt før i 1983. Det store gjennombrotet kom i 1988. Då kjøpte Samningen ein Mac og skrivar, og kunne produsere sidene sjølv. Samstundes vart staben utvida – frå ein redaktør i trekvart stilling til ein journalist i full stilling og ein redaktør i halv. Sidetalet vart og dobla, frå fire til åtte. Satsinga vart finansiert gjennom kassakreditt og teikning av nye andelar. Etter utvidinga hadde bladlaget 251 andelseigarar.

Satsinga i 1988 skjedde i von om at vekeaviser skulle få pressestøtte. Støtten for 1989 var 100 000 kroner – nesten like mykje som prisen på det nye datautstyret. Sidan har pressestøtten vore ein føresetnad for at Samningen har kunne halde fram som ei profesjonell vekeavis. I 1996 fekk Svein Oldervoll Samnanger kommune sin kulturpris for arbeidet som bladstyrar og forfattar.

Opplag

Opplagstal for Samningen, 1986-2023

Kilde:medienorge.uib.no (papiropplag til 2014; deretter totalopplag, endring i beregningsmetode fra 2018)

Til og med 2015 gjelder opplagastala papirutgåva. Frå 2020 reknar ein opplagstal for digitalt abonnement og papirabonnement, ifølgje Mediebedriftenes Landsforening.

Fakta

• Første nummer 6.12.1976. Første redaktør: Svein Oldervoll Aadland

Les meir i Store norske leksikon

Eksterne lenker

Litteratur

• Flo, I., red. (2010): Norsk presses historie 1660–2010. Norske aviser fra A til Å, bd. 4. Oslo: Universitetsforlaget

Faktaboks

Organisasjonsnummer

970956891

Sektorkode

2100 Private aksjeselskaper mv.

Næringskode(r)

58.130 Utgivelse av aviser

Kommentarar